Programa Marco de Investigación e Innovación da UE

Horizonte Europa é o Programa Marco de Investigación e Innovación (I+I) da Unión Europea para o período 2021-2027. O Programa Horizonte Europa, como o seu predecesor Horizonte 2020, é o instrumento fundamental para levar a cabo as políticas de I+D+i da UE, co obxectivo xeral de alcanzar un impacto científico, tecnolóxico, económico e social dos investimentos da UE neste ámbito, de xeito que se fortalezan as súas bases científicas e tecnolóxicas e se fomente a competitividade de todos os Estados Membros (EE MM).

Cun orzamento de 95 517 millóns de euros (en prezos correntes) para este período de sete anos, Horizonte Europa é o Programa Marco co maior orzamento ata a data, tendo o potencial de xerar importantes beneficios económicos, sociais e científicos. O Programa está deseñado cunha mentalidade de investimento, máis que como un instrumento exclusivamente de financiamento, e conta cunha planificación que axudará á UE a realizar a transición cara a un futuro próspero e sostible.

Programa conta cunha estrutura baseada en tres piares:

O Piar I, Ciencia Excelente, que, a través do Consello Europeo de Investigación (ERC), financia proxectos de investigación na fronteira do coñecemento deseñados e dirixidos por investigadores. Tamén apoia o desenvolvemento profesional e a formación do persoal investigador a través das actividades de mobilidade internacionais e intersectoriais do programa Marie Sklodowska-Curie (MSCA) e potencia o desenvolvemento de infraestruturas de investigación de primeiro nivel mundial.

O Piar II, Desafíos Globais e Competitividade Industrial Europea, financia a investigación e a xeración de novo coñecemento e tecnoloxía dos retos sociais, reforzando as capacidades tecnolóxicas industriais co obxectivo de aumentar a competitividade da industria europea (especialmente das PEMES) e establece misións con obxectivos ambiciosos orientados cara aos grandes desafíos globais (saúde, cambio climático, enerxías renovables, mobilidade, seguridade, dixital, materiais, etc.). Ademais, apoia a creación de Asociacións europeas cos EEMM e a industria para traballar conxuntamente en I+I. Tamén inclúe as actividades do Centro Común de Investigación (JRC) que asiste á UE e aos gobernos nacionais na súa toma de decisión,s achegándolles probas científicas e soporte técnico.

O Piar III, Europa Innovadora, ten como obxectivo facer de Europa unha potencia pioneira na innovación de creación de mercado e no crecemento de pequenas e medianas empresas innovadoras a través do Consello Europeo de Innovación (EIC). Este apoia innovadores, empresarios, pemes e científicos de primeira orde e con ambición de crecer a escala internacional. Adicionalmente, o Instituto Europeo de Innovación e Tecnoloxía (EIT) continuará fomentando a integración da investigación, a educación superior e o emprendemento a través das Comunidades de coñecemento e innovación (KIC).

Estes tres piares susténtanse sobre un eixe horizontal que amplía a participación e fortalece a Área Europea de Investigación (ERA), dedicada a axudar aos EEMM da UE nos seus esforzos por desenvolver o seu potencial nacional de investigación e innovación e, especialmente, a aqueles Estados con menor rendemento en I+I, para que melloren a súa participación en Horizonte Europa.

Coxestión do CDTI no Programa Marco

Dende o II PM, o CDTI impulsou a participación española nos sucesivos Programas Marco de Investigación e Innovación da UE de todo tipo de entidades, tanto públicas coma privadas (universidades, centros públicos de investigación, centros tecnolóxicos, administracións públicas, asociacións, fundacións, empresas, etc.), contribuíndo eficazmente á consecución dos obxectivos marcados en cada momento, cuxo seguimento realízase grazas á Base de datos de participación española no PM, que tamén xestiona e é a fonte oficial de información deste programa en España.

No actual Programa Marco, Horizonte Europa, o CDTI é o representante español nos Comités do Programa e actúa como Punto Nacional de Contacto (NCP) no piar III, «Europa innovadora», e nos Clústeres que compoñen o piar II, «Desafíos Globais e Competitividade Industrial Europea», salvo no caso do Clúster «Cultura, creatividade e sociedade inclusiva», en que participa como experto, ao igual que acontece no caso de «Infraestruturas de Investigación» do piar «Ciencia Excelente». Ademais actúa como coordinador nacional de NCP e conta cun NCP de Aspectos Legais e Financeiros.

Ademais, o CDTI participa nos grupos estratéxicos asociados ao PM, como os existentes para as distintas Misións e Asociacións europeas en Horizonte Europa.

Dentro do CDTI, a Dirección de Programas da Unión Europea e Cooperación Territorial é a responsable da xestión do Programa Marco, defendendo os intereses españois nos Comités de Programa nos que participa e ofrecendo asesoramento aos interesados en participar nas áreas en que actúa como NCP.

Como parte deses servizos de asesoramento, e dedicado en exclusiva ás empresas españolas que participan no Acelerador do EIC, o CDTI conta cun servizo de simulacro de entrevistas.

Pódese consultar información máis detallada sobre este Programa no portal español de Horizonte Europa, que está xestionado conxuntamente polo CDTI e FECYT e é a canle oficial de comunicación e información aos participantes e potenciais interesados no Programa en España.