O CDTI Innovación participa nunha xornada informativa sobre a convocatoria NEOTEC 2024

O Programa NEOTEC ten como obxectivo o apoio á creación e consolidación de empresas de base tecnolóxica. Unha empresa de base tecnolóxica (EBT) é unha compañía cuxa actividade se centra na explotación de produtos ou servizos que requiran o uso de tecnoloxías ou coñecementos desenvolvidos a partir da actividade investigadora. As EBTs basean a súa estratexia de negocio ou actividade no dominio intensivo do coñecemento científico e técnico.

O aspecto máis relevante nas propostas apoiadas nesta liña ha de ser unha estratexia de negocio baseada no desenvolvemento de tecnoloxía como factor competitivo de diferenciación da empresa, baseándose na creación de liñas de I+D+i propias.

Non se adecúan as empresas cuxo modelo de negocio se base, primordialmente, en servizos a terceiros, sen desenvolvemento de tecnoloxía propia.

Convocatoria 2024

A convocatoria Neotec 2024, en liña coa acción iniciada en 2022, mantén a posibilidade de proporcionar acceso a formación especializada impartida polo “Enterprise Innovation Institute” da Universidade de Xeorxia (Atlanta, EEUU), para reforzar a capacitación das empresas e as súas posibilidades de éxito no mercado, facilitar o coñecemento das empresas españolas de base tecnolóxica do ecosistema emprendedor dos Estados Unidos e achegar coñecemento especializado en áreas como innovación para a sustentabilidade -tanto ambiental como de negocio-, novas estratexias de negocio ou procesos de internacionalización, entre outras. 

Subvencións

As axudas poderán financiar ata o 70% do plan de empresa presentado cunha duración dos proxectos entre o 1 de xaneiro de 2025 e o 31 de decembro de 2026, cun orzamento mínimo de 175.000 euros e un límite de 250.000 euros por beneficiario. 

Nesta sesión informativa, dirixida a emprendedores, startups e empresas que desenvolvan proxectos empresariais innovadores e tecnolóxicos no territorio español, Carlos Franco, técnico do departamento de Promoción Institucional  e Cooperación Territorial do CDTI Innovaciónexplicará os aspectos esenciais desta convocatoria dotada cun orzamento de 20  millóns de euros na modalidade de subvencións dos cales 5 millóns quedan blindados en exclusiva para a liña Neotec Mulleres.

Tamén participará Víctor Campillo, CEO e co-founder da empresa AI NOSTRUM, beneficiaria das Axudas NEOTEC correspondentes á convocatoria 2023.

Nesta ligazón pode inscribirse a este evento. 

CDTI Innovación

O CDTI Innovación é a entidade pública de financiamento da innovación do Ministerio de Ciencia, Innovación e Universidades que promove a innovación e o desenvolvemento tecnolóxico das empresas españolas, canalizando as solicitudes de financiamento e apoio aos proxectos de I+D+i de entidades españolas nos ámbitos estatal e internacional. Contribuímos á mellora do nivel tecnolóxico das empresas españolas e impulsamos e, cunha rede internacional con cobertura de 51 países, acompañamos a participación española en programas internacionais de cooperación tecnolóxica e a transferencia internacional da súa tecnoloxía empresarial. O CDTI tamén apoia a creación e consolidación de empresas de base tecnolóxica en España.
 
O Centro para o Desenvolvemento Tecnolóxico e a Innovación, E.P.E. (CDTI) é unha entidade pública dependente do Ministerio de Ciencia, Innovación e Universidades.

Máis información:

Oficina de Prensa
prensa@cdti.es
91-581.55.00

En Internet
Sitio web: www.cdti.es
En Linkedin: https://www.linkedin.com/company/29815
En X: https://twitter.com/CDTI_innovacion
En Youtube: https://www.youtube.com/user/cdtioficial