O CDTI Innovación analiza con outras axencias europeas o impacto social dos seus instrumentos de axudas ás empresas  

Expertos pertencentes a diversos ámbitos, como a academia, a empresa, a comunicación e a administración pública, achegaron o seu punto de vista identificando diversos retos e propondo solucións para optimizar o papel das axencias europeas que promoven innovacións sociais e tecnolóxicas e que, en última instancia, pretenden xerar cambios na sociedade. Este enfoque, necesario para resolver os principais problemas do noso tempo, implica desafíos, tanto no deseño de instrumentos, como na súa implementación e a súa avaliación.

Fronte á dificultade de incorporar este novo enfoque nas axencias, a proposta dos expertos é reforzar as capacidades internas, recorrer a alianzas con actores multidisciplinares cun claro enfoque social e involucrar no desenvolvemento das innovacións aos usuarios finais.

Durante esta xornada tamén se presentaron casos prácticos de innovacións que, polas súas achegas, tiveron unha gran aceptación social. A mensaxe máis frecuente foi que é necesario reforzar as canles a través dos que as innovacións sociais chegan ao mercado, agora moi dependentes das administracións públicas.

Participación do CDTI Innovación

Por parte do CDTI Innovación, Ascensión Barallas, do departamento de Estratexia, Control e Avaliación, resaltou o papel que desempeña este organismo en España. En concreto, polo que respecta ao programa Neotec que xestiona, o CDTI incorporou criterios de impacto social na avaliación deste programa co obxectivo de pór o foco nas persoas, tanto naquelas que interveñen nos procesos de innovación tecnolóxica como nos destinatarios finais da tecnoloxía. 

Máis aló do impacto de Neotec na xeración de tecnoloxía de vangarda, a transferencia de coñecemento e a consolidación das empresas, este programa ten un alto potencial para contribuír á solución de problemas sociais. Así o reflicten varios indicadores extraídos na súa avaliación:

• O 40% dos empregos xerados polas empresas beneficiarias débense ao apoio de Neotec. Ademais, o programa xera un impacto positivo na contratación de menores de 25 anos e un 7% das empresas emprega a persoas con discapacidade.

• As empresas Neotec son máis proclives a fomentar a igualdade de xénero con medidas como son o control da retribución ou os plans de prevención de acoso, nunha contorna onde a presenza de mulleres supón o 34% dos persoais e o 28% dos postos directivos.

• Os aspectos sociais aos que se dirixen con máis frecuencia os proxectos presentados a Neotec son os relacionados con saúde e calidade de vida (60%), seguidos pola fenda dixital (24%).

• Os obxectivos ambiental máis frecuentes son a redución da pegada de carbono (55% dos proxectos); a mitigación do cambio climático (49%) e a transición cara á economía circular (45%).

• Neotec ten un impacto positivo na política de responsabilidade corporativa das empresas, concretamente na incorporación de aspectos relacionados coa getión da diversidade (+10%), o coidado da saúde e a seguridade laboral (15%) e o cumprimento adecuado das obrigas tributarias (+12%).

A partir desta evidencia, o CDTI Innovación estableceu como obxectivo potenciar o impacto social dos programas que xestiona, interactuando cos integrantes do ecosistema de innovación e fomentando o achegamento das políticas públicas de I+D+i á sociedade.

A través desta ligazón pode acceder ao Informe de avaliación do impacto social de Neotec.

Vídeo coas principais mensaxes da avaliación.

CDTI Innovación

O CDTI Innovación é a entidade pública de financiamento da innovación do Ministerio de Ciencia, Innovación e Universidades que promove a innovación e o desenvolvemento tecnolóxico das empresas españolas, canalizando as solicitudes de financiamento e apoio aos proxectos de I+D+i de entidades españolas nos ámbitos estatal e internacional. Contribuímos á mellora do nivel tecnolóxico das empresas españolas e impulsamos e, cunha rede internacional con cobertura de 51 países, acompañamos a participación española en programas internacionais de cooperación tecnolóxica e a transferencia internacional da súa tecnoloxía empresarial. O CDTI tamén apoia a creación e consolidación de empresas de base tecnolóxica en España.
 
O Centro para o Desenvolvemento Tecnolóxico e a Innovación, E.P.E. (CDTI) é unha entidade pública dependente do Ministerio de Ciencia, Innovación e Universidades.

Máis información:

Oficina de Prensa
prensa@cdti.es
91-581.55.00

En Internet
Sitio web: www.cdti.es
En Linkedin: https://www.linkedin.com/company/29815
En X: https://twitter.com/CDTI_innovacion
En Youtube: https://www.youtube.com/user/cdtioficial

Este contido é copyright © 2024 CDTI,EPE. Está permitida a utilización e reprodución citando a fonte e a identidade dixital de CDTI (@CDTI_innovacion).